من النخرة للكُراع.. جغرافية الجسد المشوه

بعض الشعوب التي تدعي العروبة أصل ما أصل... وانهم هم العرب العاربة ونحن العرب المتسلبطة.... بالرغم من رأي طه حسين في حكاية عاربة ومستعربة دي وطلّعهم أي كلام في كتابه المثير للجدل في تاريخ الشعر الجاهلي.. وقال ما في نضم زي دا لا في عرب عاربة ولا عرب مستعربة.... دا نضم قطعوهو العرب الحسي ديل من روسينهم لأسباب كتيرة وحسي دي ما مناسبة النضم فيها... أما نحن أحفاد بقايا العرب الشاردة من صراعات السلطة في العصور الإسلامية المتعاقبة... اختلطنا بأجناس أخرى وتلاقحت ثقافة الوافدين مع ثقافة المقيمين والنتيجة الثقافة السودانية الحسي... النضم بقى مميز لينا... وماركة مسجلة... تعرف السوداني من ينضم معاك... لو إنت في غربة... تبداها من كلمة (زول) والتي أصبحت دمغة دامغة لكي سوداني.. سبق وأن ذكرت أن زول معناها بالعبري ( رخيص)... وبعضهم أخذ على عاتقه شرحها لكل من سأل عنها جادا أو متهكماً... باديا زال يزول فهو زوال... والزوال هو الخيال.. عرب بادية الشام والمناطق السعودية يستعملونها تعبيراً عن خيال الشخص وخصوصاً بالليل... ويعنوا بها الخيال الشبح.. اللكدمة الماشة.. وكانت نساؤنا كثيراً ما تستعمل كلمة الله يزولك... يعني الله يطيرك وما تجمع.. وزول من وشي.. يعني طير من وشي زح من قدامي... وهنا الفعل زول من زوال يعني اختفاء...لا اعتقد أننا عنينا بكلمة زول المعنى خيال... أو المعنى اختفاء... أو المعنى العبري الذي يحسسني بأكل اللحم والدخول في الضفور.. فعلينا بالبحث عن معنى مقنع لنا قبل المتسائلين.. أمّا في الجسد تجدنا قد لعبنا ببعض الأعضاء من جسدنا.. فنطلق على الأنف نخرة... واعتقد أننا الشعب العربي الوحيد الذي يطلق على الأنف نخرة... على الفم خشم.. أشقاؤنا المصريين وبعض من بني يعرب يطلقون على الأنف منخار... وكلمة نخرة كلمة شينة والله شينة شينة... وخصوصاً لو حاولنا تصريفها فوضعناها موضع الفعل المضارع... والفعل نخر بمعنى حفر.. نخرت المرا الباضنجان.. أي قورتو... ونخرت العوّارة كُراع الشافع...أي سوّت فيها حفرة.. ولو مشينا وبحبتنا ورا كلمة نخرة واحتمالتها ولي شنو اطلقناها على الأنف.. ح نلقى أننا اعتبرنا أنوفنا عبارة عن حفرة خالية من أي ولو شوية مسحة جمالية... وهو ذم لأداة من أدوات التنفس شايلنها في وشينا وحايمين ونشتم فيها... أما الخشم وهو من خياشيم... وخيشوم.. ويستعملها العرب أيضاً إشارة إلى الأنف وخياشيم السمكة للتنفس... وهنا نكون أيضاً قد وضعنا عضو في غير موضعه من سبق الإصرار والترصد... ومكونات الخشم من شلاليف... فإننا قد تميّزنا بإطلاق كلمة شلوفة عوضا عن الشفة والشفاه... وبرضو شلوفة كلمة شينة منفرة... واعتقد أنها تطلق على شفايف الناقة... وبحق وحقيقة شفاه الناقة شلاليف.... وامعاناً منّا في إهانة الشفايف... كان دق الشلوفة... يمارس بعنف للنساء.. أيضاً كلمة كراع للقدم.. وكراع برضو تطلق على أقدام الماشية... ما عارف هل نحن وصلت بنا الحال حتى نسخر من تكوين جغرافية أجسادنا... ما أظن...!قفل الباباليوم أوقن أنني لن احتمل !!اليوم أوقن أنّ هذا القلب مثقوب ومجروح ومهزوم وأنّ الصبر كلوتحوّل لجة حزني المقهور... تكشف سوقها كل الجراح وتستهلهذا أوان البوح يا كل الجراح تبرجي ودعي البكاء يجيب كيف وما وهلزمنا تجنبت التقاءك خيفة.. فأتيت في زمن الوجل.خبأت نبض القلب- كم قاومت- كم كابرت- كم قررت- ثم نكصت عن عهدي .. أجل


د.عادل الصادق المكي

كتير من كلامنا متميزين بيهو برانااااا ومنو الاختراعو مامعروف زاتو
ذي بنقول للمكان (فجة) ولي انزل(ادلا)
وكلام كتير بس اكتر حقارة حكاية النخرة والشلاليف دي

بطلعوك انتي الغلطانه
وبقولو اتفلهمتي ههههههههه
وصعب انك تغيري كلمات من زمن جدودنا
غايتو الا تعملي رايحة هههههههه

ههههههههههههههههه
لالا والله العفو
بس نحن من قمنا متعودين نقولا غلط حتي لو قولنها صح ح نحس بيها غريبة والناس برضو
يعني عاوزة اجتهاد شوية
يعني ح نقول انف؟؟؟
غايتو شفايف ساهلة بس النخرة ي المشكلة الكبرى هههههههه

هههههههههههههههههههه
ااي احسن حل نعلم الاجيال الجاية
وبيني وبينك اصلا هم طالعين مفلهمين وعندهم رائ في ناس زمان يعني في امل الكلمات الغلط تتختفي
ونحن نستخدم الاشارة علي قولك ههههههههه

والله يا فراشه ويا زوبه مبالغه

بالجد نقاشكم فاق الموضوع روعه

تسلموا ....

الله يسلمك يابيدو
وشارك معانا في تغير الكلمات الخطأ دي

ما عندي ليكم شئ
ودي بقت نكهه خاصه بينا
ما مهم دلالته بتحكي عن شنو بلغات اخري
بقدر ما بتحمل طابع ذكريات حلوه عشناها مع اعز الناس الينا
بتفصل ملامح ايام شكلت اعمارنا وذكرياتنا
فهل في واحد منكم قادر انو يطمسه ......؟؟

اتذكر اي حاجة حلوة وغير نخرة دي بس
نحن عندنا حاجات كتيرة حلوة بتميزنا عن غيرنا واكيد ما حنفكر يوم انو نطمسا انو نتبرا منها
بس نخرة دي قاسية شديد(مأزماني)

زوبه .. نقطه سطر جديد هههههههههههههههههههه
كوين جااااااااااااااامده يا بت واعتبرينا في الويتين للزمن ده