قطع غيار زول.. للبيع

سبق وأن ناقشت موضوع المرا المصرية الباعت راجلا لي مرا تانية بسعر تسعمائة دولار...والمشترية استلمت الراجل وساقتو من أضانو ومشت بيهو أهلها.. والله أعلم !باقي لي ناوية تستثمرو... حقيقة الموضوع دا شغلني كتير وقلل نومي... وبقيت قشت عيني من النوم اتلفت وأعاين يا ربي ديل أهلي واللا أنا باعوني...؟....فكرت في موضوع البيع دا... وقلت المرا المصرية ما تفتيحة لو باعت الراجل تشليح كان ربحت واتملت قروش... لكن أظنها كانت مزنوقة حبتين...أولاً بالتبادي أنا ما عندي مانع إني اتباع.... لكن بالقطاعي... وسبق برضو أن عرضت لساني للبيع.. لكن لي حسي ما لقيت لي زبون... ما عارف اللسنات سوقن نايم واللا شنو؟...أي عضو فيني بالجوز.. أبيع فردة وأخلي فردة... أي حاجة وركزو معاي في أي حاجة دي!!...أبيع أي حاجة ومعاها كتلوجها وطريقة الاستعمال ولو في حاجة دايرة ملحقات تكون معاها...عشان ما في زول يستعمل حاجة غلط ويرجعها.. مثلاً فردة عين معاها فردة نضارة مقاس تلاتة ونص للقراية وفردة نضارة شمش للفلهمة.. وحاجب مشرور.. ورموش عدد اتناشر رمش فوقاني وستة رموش تحتانية.. وستة رموش تحتانية عشان في فترات قاعد أحك العين كتير أها في ستة رموش اتقطعن وباقي ستة ..أنا زول واضح وما داير أغش زول ..الرموش راقدات ماليات السوق لكن من غشنا ليس منّا....مع ضمان سنة أنها لا عين طايرة ولا عين حارة بعد السنة أنا غير مسعول .....الإضنين ..لو في زول داير يشتري أضان واحدة برضو معاها علبة كبريت عشان لما تاكلو يحكها بعود كبريت.. علبة الكبريت هدية ...شفتو الفنجرة دي؟.. والأضان ممكن تشتغل على منظم السمع البيبدأ تدرج درجاتو من الدرجة (أضانو خفيفة) وتنتهي بالدرجة(أضان الحامل طرشه)..ومعاها برضو علبة عجين من دقيق سيقا.. وعلبة طين بحر.. عشان لما يشغلها على موجة (دي فيها طينة ودي فيها عجينة).. يختار البعجبو... يا الطين يا العجين... ......( زيادة في الفهلوة الطين والعجين لما يخلصو.. أكون أنا المورِّد الوحيد والأوحد للطين والعجين).كل الحاجات دي مع شهادة خلو طرف من الضرائب وترخيص من وزارة الثقافة والإعلام بممارسة السمع!...الكلاوي... نبيع واحدة مع الحالب مع بلومة "همبوكة" لو ما داير المثانة....بالإضافة الى تفريغ مجاني لمدة سنة في حمامات الإستاد الخرتوم....!...أها نجي للكبدة.. الكبدة فيها أربعة فصوص...ح أبيع تلاتة فصوص... وأخلي فصيص واحد أمشي بيهو أموري....... كفاي!.. لكن في عضو أصلو أنا ما شايف في داعي ليهو... الصُرة... الصرة زيادة حمل... ح أبيعها... يعني أي زول صُرتو ما مظبوطة... ح أبيعها ليهو... ومعاها... دستة مفكات نجمة....هدية أها فنجرة تانية.....عشان المشتري لو الصُرة رخت معاهو .. يربطها بي واحد من المفكات دي......

د.عادل الصادق المكي