جواب للغالي في الغربة

اشتقت ليك ولجلستا في رمل المحبه جبن شاطئ الامل المصبرنا علي الزمان المر
الغربة حارة نارا تكوي فيني وفيك ومصبرنا قولت مصير الحي بتلاقي ومهم طال بعادك سنين مكانك جوا قليبي تروح منو وين
اما عن احوالي أنت عارف البي لوعة وشوق فات الحد ...وكلنا بخير يالغالي
يانا نحن بس الزمن اتغير دايرة احكي ليك عن حلتنا وعن حالنا البقى ماياهو
سهير بت خالتي سعدية جاها عريس شالا من ظلام الفقر وريح امها التعبانة تبيع الكسرة ومرات تحنن في النسوان شان تجيب حق اللقمة
ومادايرة اذيد همك هم بس عمنا الكان بقعد في ضل النيمة وكل ماشافنا استقبلنا بالدعوات ربنا يغطي عليكم يااولادي من العين ومن ظلم الدنيا
وليدو الوحيد قاسى القلب وداهو لدار العجزة قال شان كلامو كتر وبضايق جيران _هم وين الجيران مش ناس فاطمة الماعندهم غير قالو وقلنا وسيرة الناس وشيل الحال!!!
عمنا مااتحمل سجن ولدو وقهر الدنيا الخلت الناس تعصى الخالق شان مخلوق
عمنا فات شال دعواتو وشال فرحتنا بشوفتو وودع دنيا مافيها امان
امانة عليك في صلاة ادعي ليهو بالرحمة ويدخل جنة الصالحين
وفي الاخير بقول ليك كفاك غربة كفانا بعاد دي دنيا غدارة والببباريها اكيد خسران

انتوبتذاكرو من ورانا وللا ايه؟.... ابداع زينب والفراش الحائر
دنقلاوى سالوه : عامل كيف مع الغربه ؟ قاليهم :بس صعبه العشرين سنه الاولى؟؟؟؟

ابداع يافراشة
بوخو ههههههههههههههه ذي الجعلي القال من شدة ماالغربة حارة لمن تلاقي شايقى تاخدو بالاحضان

ما كل خيال حقيقة يافراش ههههه