اعزائي المشاهدين اليكم نشرة الاخبار

مقدمة النشرة

مجلس الكدايس العالمى يعصر الحكومة الطالوشية
انهيار راكوبة بالسوق الشعبى تؤدى لهروب المساطيل
وبالنشرة مزيدا من الشمارات
مشرشر النشرة كراضم ابن كرضمة العلفى

انهارت ظهر اليوم صباحا راكوبة المشمعات السلكية واللا لا للكشات وقد اسفر هذا الانهيار الى فرتيق وتفكيك الراكوبة وارداها كنيشة ... وقال مراسلنا من دفار الكشة ان الشرطة قد منعت المراسلين من الدخول الى موقع الويب سايت الخاص بالسادة المساطيل ... من جهة اخرى ادى الانهيار ايضا الى هروب المساطيل من موقع الراكوبة راجلين حتى شارع 61 احتجاجا على ردم الهوة التى اثارها احد المتداخلين فى ندوة بعنوان ( الراكوبة السطلية بين التزاحم والتراحم الانكفائي ) مما اضطر هؤلاء الى الفرار , ورفعوا شعار الفرار الى جحور الفار
افضل قرار ...

فكّا عدد من المجانين اليوم ... فكوا البيرق وقاموا صوفا وليس قطنا ... هذا بعد ان ترك غفير مستشفى المجانين الباب مفتوحا ... وقد توجه موكب المجانين صوب الهيئة القومية للكهرباء وعبروا عن سعادتهم لبرنامج القطوعات المتواصلة ... وذلك لانهم لا يريدون العلاج بالكهرباء .

عصر مجلس الكدايس العالمى يوم امس ... عصر الحكومة الطالوشية بسبب قضية السلسيون المتداولة فى الاوساط العالمية حاليا ... جاء ذلك اثر قيام الحكومة بأنتهاك صارخ لحقوق المواطنين ... وقد اجهر بعض مندوبى الدول بالعصا المضببة والسفاريق اذا لم توقف الطالوشية الجبخانات وغطيس حجر المساكير.

انتقل مرض جنون البقر الى الناس واصاب فيمن اصاب الدكتور ديفيد عباس الذى اصبحت حالته خطيره وصار لا يكلم الناس ولا يفرق بين الدوم والاناناس ... وبعد الكشف عليه اتضح ان فصيلة دمه ( O ) بقرى .

تعرض مستشفى كوستى اليوم الى هجوم من قبل الكدايس الشنبية ... ذات العضلات المفتولة والبشكيرية الملمس مما ادى الى فوضى عمت انحاء الاسبتالية والمناطق المجاورة والمجرورة بالجرى نحو الخلاص ... وافادت مراسلتنا من هناك ان هذا الهجوم جاء بعد ان اذدحمت غرفة المشرحة وعرقلت سير حركة الكدايس اليومى .. وافاد شهود عيان ان الكديس يخرج من جيبه كيس نايلون ويمد لك يده صاّراً وجهه المتجهم بأن تعطيه والا سوف يعضعضك عضا لماً ... ويلم فيك يخلى ريحتك طير طير .

فاز المطرب العالمى مايكل جاكسون رزق الله ... فاز اليوم بجائزة الدلوكة الذهبية فى مهرجان ديم سلك العالمى وصرح المطرب رزق الله لوكالة شمار فى مرقة انترناشيونال ان مشاركته جاءت بناءا على التنافس الشديد بين المطربين العالميين فى العام السابق مما حدا به ان يدق صدره هذه المرة حتى يتمكن من الفوز بجائزة الجردقة الكبرى وتبلغ قيمتها سبعة شوالات مرحبيب .

اغارت قوات الملايات الملتحفة الامهيرية ... اغارت اليوم على مواقع يعتقد انها لابو مركب السمكاوى .. وجاء بيان وزعه الناحر الرسمى للقوات متعددة المشاكل والربيط ... انها عثرت بعد الغارة الجوية على اكياس مليئة بالفول السودانى ... وقد اتهم البيان جمهورية الكيزان الطالوشية بدعم الارهاب والوقوف مع ابو مركب السمكاوى .... ومن المحتمل ان يصدر مجلس الكدايس العالمى مساء اليوم قرارا بهذا الشأن .

القت الشرطة اليوم على احد عشر طاشما من الشباب الخريجين فى احد المجارى القومية بالخرطوم ... وبعد الكفكفة والدق الشديد والشلهتة اعترف الطاشمين بأرتكابهم جريمة الطشم المتعمد مع سبق التردد ... يذكر ان هؤلاء الشباب قد خرجوا فى موكب صامت من قبل مطالبين جمهورية الموز بأسترداد سحلبتهم ووعيهم المفقود وعيونهم الطالعة من الدق والشلاليت والكشة .

ايها السادة اليكم هذا الخبر السرى .......
انتهى الخبر ..

تم اليوم بأستاد الخرطوم تخريج الدفعة طاش وطاشين والتى يتكون كل اعضائها من الناس الحُوص وقد قد تم توزيع اى احوص الى قسم القصف العشوائي .

من انبائنا المحلبية .... توفى السيد تنبلة ابن الجكام الجلكوز الذى لا يشرب وطبعه كعب بيدخل راسو جوة الكوز جاءنا مكشوش جابتو الكشة بمجروس ...... وقد توفى اثر انزلاقه بملاح ام رقيقة فى تكريم الدفعة طاش وطاشين ..

معنا داخل الاستديو الاستاذ مطلق بنات الناس دون سبب .... والمتخصص فى الطلاقات .
آ آ ... استاذ مطلق ... مشكلة العزوف والعزف على الجيتار للشباب والشابات على اللفة عن الزواج واثره على التنمية الدموغرافية فى السودان ... ما هو رأئك الصريح ؟
اذا اخدنا الحالة الخاصة لى انا مثلا بعتقد انو مسألة العازفين هى عشاء الفنانين ... اقصد هى مشكلة البت والولد ولكن لو شفنا الحركة الزواجية للعازفين اليومين ديل بالذات بنجد انو الجمهورية الموزية ابتكرت زواج جميل جدا وانا طبعا اول المستفيدين منو ... وهو الزواج الجماعى ... وطبعا موت الجماعة عيد سعيد وكل عام وانت بخير .... طبعا انا مستفيد من مسألة القطعة الادونى ليها بالرغم من انها بعيدة والواحد بيمشى النهار كلو عشان يصل للرخطوم مرخرخ وغبار البكاسى والكتاحة وطبعا دى قالوا جوة الخرطوم .... ما مشكلة الموية بنجيبا معانا بالجركانة عند العودة ... يعنى اى زول راجع بيتو اخر الليل بشيل معاهو جركانة ... افتكر مرة واحد شافنا فى بوكسى قال لينا انتو ماشين وين بالجركانات دى ... هاهاهاهاهاها ... وكانت فكرة كويسة انو الجركانات تكتر فى بوكسى ركاب ... والشئ التانى انو بعد ما يدوك القطعة دى وبالرغم من انها فى ام طرقا عراض الا انك بتفك بت الناس فى اقل من يومين وطبعا انت عارف ما ممكن الواحد يشيل معاهو جركانة كل مرة والشرطة تتهموا بأنو بيتاجر فى الطشمة .... عشان كدة الواحد بيعزز من مسألة الزواج الجماعى دى وبيقول الله يخلى لينا جمهورية الموز الطالوشية ...
طيب يا سيد مطلق ... القطعة الادوك ليها دى لقيتا طوالى ؟ .... وحات الطاحونة وشيخى سى دى كاسيت عينى طلعت .. واذا دققت النظر بتشوف انى بقيت احوص وقربت انضم لكتيبة القصف العشوائي ... يعنى كل يوم انا شايل جركانتى دى وماشى مكتب الارضى ( الله راضى علينا وعليكم ) يعنى تشوف الصف من هنا لحدى جبل اولياء تقول الناس ديل واقفين فى صف الموية ولا شنو .؟ وما اكضب عليك ... مرة اتشاكلنا فى صف الجركانات واحد ادانى باقة طايرة ذكرتنى وخلتنى اقول يا ريت لو كنت عذابى وما شلهت معاى بت الناس دى ... وبفترض انو الصفوف الطويلة دائمأ بتؤدى للتهلكة فى بعض الاحيان يعنى صف الهجرة وصف التأشيرة وصف الموية وصف الحلاقة فى الكشة وصف الرغيف وصف انك تكون واقف فيهو يقوموا يدوك اورنيك تملاهو ويقولوا ليك بكرة تعال حالق ... فطوالى الواحد بيفرتق ومرات ينسى فى رحمة الغبار كل الاكياس الشايلا وجركانتو الحنينة وبت الناس المقطوعة فى الخلا والعاضى عليها بالعواجز ... وبهذه المناسبة بدعو العازفين للعزوف فى المقطوعة التانية اقصد الدفعة التانية ... واسمح لى لو كان كلامى معاك كلو بوت وعسكرية عشان اخوك كان فى السابق مستف بالجبخانة لحماية جمهورية الموز الكومرية ... اقصد الشلاليتية ..

السادة المستمعين فى الختام بنشكر السيد مطلق ... الخبير فى الشئون الاجتماعية والمتخصص فى طلاق بنات الناس بدون كضب والحامل للاوسمة الكتيرة لحدى ما رقبتو مالت من الشيل ... بنشكرو وبنقول ليهو نلتقى فى محطة تانية ...

اما الان مع برنامج ( فى حارات الشواء ) تقدمه فرقة التوجيه الجلطى ... قسم غسيل الاموات
ف الى هناك

ههههههههههههه الخبر السري رهييييييييييييب

لكن بالجد يا ايمن بقيت اشوف عشرة عشرة بقيت الجاحظ بس