ساخر سبيل : أطوار الحب 12 كتابات الفاتح جبرا

تمتلئ المكتبة العربية بقصص العشق والهيام التى خلدها التاريخ (العربى طبعن) فهنالك قيس و ليلى .. عنتر و عبلة .. جميل و بثينة وغيرها من (الثنائيات) التى نسجت حولها القصص والحكايات ، وكنت أظن (وليس كا الظن إثم) وإلى عهد قريب أن هذه النماذج من قصص الحب الملتهبة التى قرأناها لا تعدو أن تكون (حاجات فردية) ممكن تحصل لدى أى أمة من الأمم وإنها بأى شكل من الأشكال لا تدمغ (العرب) بأنهم أمة (تموت فى الحب) و(النساء) إلى أن وقع كتاب فى يدى يوضح إسماء أطوار ومراحل (الحب) وإسمائها !! ومواصفات كل (مرحلة) وطور من هذه الأطوار والتى بلغت (إثنا عشر) طوراً بالتمام والكمال ! فأنظر عزيزى القارئ إن كنت ممن يعيشون (قصة حب) فى أى مرحلة من المراحل إنت حتى إذا ما سألتك حبيبتك :
- بتحبنى قدر شنو يا عوض؟
أستطعت أن تجيبها بإسم (المرحلة) التى وضعها لك (أجدادك العرب) حسب التصنيف العالمى (للفيفا) بدلاً عن تلك الإجابة التقليدية التى يحفظها (الحبيبين) عن ظهر قلب والتى تقول
- قدر الكون ده كوووولو
وهذه الأطوار هى :
(1) الهوى :
وهو أول درجات الحب يعنى أول ما ضربات قلبك تتزايد وتقعد (تتراجف) ويغلبك الكلام وتبدأ تبلع فى (ريقك) !

(2) العلاقة :
والمقصود بيها بداية المشوار أى المرحلة التى تأتى بعد القبول وكده

(3) الكلف :
فإذا ما اشتدت لوعة العلاقة اصبحت كلفاً ! وهو شدة الحب

(4) العشق :
اذا زاد الكلف عن ذلك اصبح عشق وهو والعشق يأتى إذا ما زاد الكلف عن كونه كلفا (ومافى زول يسألنى كيف عشان أنا ذاتى ما عارف!)

(5) الشعف :
وهو الحب مع الشعور بلذة ( يبقى يا سيدى إنت ح تكون فى مرحلة الشعف عندما تحس بمتعة وأنت تقوم بدفع فاتورة الموبايل الباهظة نتيجة لمحادثاتها)

(6) اللوعة :
وهى عندما يستولى (الحبيب) على قلبك دون أو تستطيع منه إبتعاداً أو فكاكاً (يعنى خلاص الموضوع بتاعك منتهى)
(7) الشغف :
وهى المرحلة التى يتربع فيها (الحبيب) داخل شغاف القلب (يعنى ذى ما بيقول فناننا وردى فى أغنية أول غرام لما قال – وفى قلبى إحتويتو - )

( الجوى :
وهى المرحلة التى لو نظرت فيها لأى شئ لوجدت صورة حبيبك عليها (والتى جسدها شاعرنا عندما قال – أنا يا طير محل ما تطير بشوفك
(9) التيم :
أى استعباد الحب (وديل ناس لولا ربى وجهنم لعبدتك وسجدت بين إيديك) وهو الاستعباد

(10) التبل :
متبول اى مقبل على فقدان عقلك !!!! (حاول أن تحجز ليك صينية أربعه شوارع رئيسية)

(11) التدليه :
هى ذهاب العقل من شدة الهوى (وعلى الصينية عدل) !

(12) الهيام :
وهى أن تصبح شخصاً هائماً او هيماناً من غلبة الهوى (يعنى تنزل من الصينية وتبدأ تلف فى البرندات والشوارع)

أهو برضو (أجدادنا العرب) خلو لينا حاجه مفيده وتانى لو واحد (حبيبتو) سألتو (بتحبنى قدر شنو) يقدر يجاوب إجابه (دقيقة) ويقول ليها :
- والله أنا هسه فى مرحلة (اللوعة) وكلها يومين تلاته ح أكون فى مرحلة (الشغف) !!

انت شكلك وصلتا رقم11 التدليه ههههههههههه

ااي اثبتي علي رقم 9 واختي الصينية والحتات دي
بس بتقدري تقيفي مكانك؟؟؟؟؟؟

خلاص انا بشجعك تقيفي في 7 للضمان
بس الخوف بعد ماترجعي تتقدمي اكتر بعدين هههههههههه
طمنتك زيادة صح؟؟؟

انتي من الاول اتورطتي فيهو
مافي طريقة للخروج منو بس بدعي ليك تتطلعي باخفا الاضرار منو هههههه

هو لسه قاعد عندك قلبك؟؟؟
معناها ماحبيتي لسه
لو بتحبي بكون عندو هو
بس حلوة فكرة ننزل اعلان قلب للبيع
ههههه

ما سمعتي يا فراشه البقول اذا عرضتني للبيع فانا لن ابيعك .. ساتصدق بك واكتب عليك مجانا

مش انتي لسه في 9 ولا اتحركتي؟؟؟
لو لسه مكانك ماوصلتي مرحلة العذاب لسه شوية
لاتبعي روحك ولاقلبك خليهم ملكك انتي بس وممكن تخليهو يشاركك في قلبك بس مايبقي ذي قضية فلسطين هههههههه

ههههههههه
حاضر ياستي
خليكي في منتصف الدائرة واكيد رغم صعب المتاهة بس في طريق للخروج
بس لازم تتطلعي منتصرة ومعاك روحك وقلبك
وانا معاك بشجعك بجد

ههههههههههههههههههههههه حلوة , دي بقت مراحل تعليمية قصدي روحية , و التخرج بالمعدلات بيصور اي درجة او اي مرحلة وصل ليها الفرد المسكين , يعني نفترض انو الامتياز = الهيام و الجيد جدا = التدليه و هكذا ,, و منو العوض وليهو العوض في عقل الخريج المتفوق ,,,

انا ما مريت بى اى مرحله من ديل يا الله ادينا ان شاء الله المرحله الاولى بس

انت شايل المواد دي كلها بدايل يابوخو ولاشنو
ان شاء الله قول رقم 2 بس

ياهديل اها ودرجة تخرجك شنو ولا لسه في سنة اولي غرام هههههه

يا فراش الله يجبر كسرك وما نجيك في وحش ...

زوبه .. خبره وخيط .. انتي كده ( اصبع فوق ) وشكلك كده منظراتيه ساااااي

تسلم يا بيدو
بري مامنظراتية ولا حاجة
اها انت لسه واقف في رقمك ولا اتحركتا خطوة ؟

خلاص ما راحت علينا يا زينب قال نمره 2 .... عشان تودينى لى عرس؟؟
لايلدغ المؤمن من جحر مرتين هههههههههههه

ههههههههههههههههههه
الشرع حلل اربعة
ماتسمعنا ام الاولاد هههههههههه